لست وحدك حبيبها.. الفصل الأول

 

لست وحدك حبيبها.. الفصل الأول

في الحب لا يوجد منتصر ومهزوم، ملاك وشيطان ولا مكان فيه لدور الطيب أو الشرير؛ فالجميع ضحايا هزمتهم قلوبهم وانتصر الهوس

يناير 2028

داخل أروقة مستشفى السلام الدولي وقف آدم ينظر لنور منتظرًا إجابتها، كانت تنظر لغرفة العناية المركزة متجاهلة إياه وفجأة ألتفتت له وقالت: هتجوزك بشرط واحد.

ابتسم آدم وقبل رده عليها أكملت نور: الحوار ده يوسف مش لازم يعرف عنه أيّ حاجة وإلا اعتبر اتفاقنا لاغي كأنه لم يكن..

..مش فارق معايا يعرف أو ميعرفش

طبعًا مش هيفرق معاك حاجة ماهو الشخص اللي بيستغل حياة ابن عمه عشان يسرق منه خطيبته توقع منه أيّ حاجة بس اللي مستغرباه فعلًا أنك مكنتش كده إزاي بقيت أناني أووي كده يا آدم؟؟؟

أنا مش أناني يا نور هو اللي أخدك مني أنا اللي حبيتك الأول أينعم معرفتش أعبر لك عن مشاعري بدري بس ده ميدهوش الحق أنه يتحرك قبلي أوعي تكوني فاكرة أنه بيحبك... قبل ما يكمل جملته نظرت له نور بعصبية وأشارت في وجهه بسبابتها: إياك... إياك تشكك في حبه، على العموم مفيش فايدة من الكلام معاك ممكن لو سمحت متضيعش وقت أكثر من كده وتروح تعمل تحاليل العملية.. وبحذرك للمرة الأخيرة لما يوسف يفوق من العملية أوعى تجيب له سيرة على اللي حصل.. مش عايزاه يكرهك زي ما كرهتك.

استمعت آلاء بصدمة لحوار ابن عمها الذي هدد خطيبة أخيها وأجبرها على تركه مقابل موافقته على التبرع بكليته لإنقاذه.. 

فبراير 2028

طرقات على باب غرفة يوسف بالمستشفى.. لحظات ودخلت نور فوجدت آلاء بجوار سرير أخيها تنظر لها بحزن وشفقة، لاحظ يوسف ملامح الحزن التي خيمت على وجوه خطيبته وأخته فقال لهن: مالكم يا بنات مين زعلكم وأنا في الغيبوبة؟؟ ردت نور بابتسامة خفيفة: هو في حد بيقدر يزعلنا غيرك؟ أنا كام مرة قولتلك متسوقش وأنت متعصب ينفع اللي حصل ده.. -خلاص يا نور وبعدين متقلقيش يا ستي لو عملتها تاني آدم موجود هخليه يتبرعلي بكليته التانية، آآه صحيح طمنوني عليه الدكتور قالي أنه خرج بس لحد دلوقتي مشفتهوش.. نظرت نور للفراغ بغضب تحاول كتمانه ولكن كلمات آدم لا تزال تتردد في عقلها ثم قطعت آلاء صمتهم وقالت: آدم كويس متقلقش يا تكون فاكره أتبرعلك بكليته لوجه الله.. وقعت كلمات آلاء على مسامع نور كالصاعقة ونظرت لها تحاول قراءة ما يجول بعقلها، لكن آلاء صمتت فجأة؛ فنظر لها يوسف متسائلًا باستهزاء: إيه طلب منكم فلوس عشان يتبرعلي أكيد عملها دا مادي بحت ابن عمي وأنا عارفه بس معتقدش الأمور وصلت للدرجة دي تلاقيه جنن الدكتور وكان خايف على نفسه، المهم هو كويس دلوقتي؟؟ ردت عليه آلاء: كويس.. صحته أحسن منك.. نظر يوسف لنور: مالك يا نور في حاجة مزعلاكي قاعدة بعيد ليه في كرسي فاضي جمبي على فكرة.. -مفيش حاجة هو بس ضغط الشغل والفترة اللي كنت تعبان فيها كانت فترة صعبة خلي بالك أنت من نفسك أنا سألت الدكتور وقالي هتخرج بكرة لو بقيت كويس ممكن نتقابل يوم الجمعة هحجز تذكرتين للفيلم اللي بتحبه وبعد الفيلم.... سكتت نور فجأة فنظر لها يوسف بابتسامة خبيثة وقال: وبعد الفيلم إيه اللي هيحصل؟؟ هتخطفيني؟؟ معنديش مانع بس كنتي استنيتي عليا شوية أنا لسه خارج من العمليات.... نظرت له نور بضحكة يملؤها الوجع: بطل هزار ومتتعبش نفسك هشوفك يوم الجمعة بإذن الله.

************

في السيارة نظر يوسف لنور: هااااا مش هتقوليلي هتخطفيني لفين؟؟

ردت نور بجدية: أطلع على ايّ مكان هادي وياريت ميكونش في ناس كتير 

نظر يوسف لها بضحكة هادئة: أنتي هتخطفيني بجد يا نور طيب يا ستي موافق المشكلة مفيش دلوقتي مكان هادي ومهجور كل الأماكن فيها ناس... أنتي السبب معملتيش حسابك ليه من بدري ودورتي على مكان مهجور.

-أطلع على الكورنيش يا يوسف بس لو عديت على قهوة أو كافيه في طريقك نزلني أجيب قهوة عشان مصدعة.

(كورنيش النيل الساعة 8 م - 28 فبراير 2028)

عارف الساعة كام دلوقتي يا يوسف؟ الساعة 8 والنهارده 28 فبراير 2028 أنت عارف أنا بحب الأرقام المميزة والزوجية بس لأول مرة النهارده أكرهها.. يوسف أنا مش قادرة أكمل.. متسألنيش عن أيّ شيء بتمنى لك السعادة وأن شاء الله تقابل واحدة أحسن مني وتحبك أكتر مني... قالت الجملة الأخيرة بنبضات قلب تكاد تنفجر وتركت له خاتم الخطبة وتركته مصدومًا وحده على المقعد متخيلًا أن كل ما حدث مجرد حلم أو مقلب سخيف منها... مرت 10 دقائق ويوسف لا يزال ينتظر عودتها ولكنه رآه هو بدلًا منها... أنه آدم