مميزات رجل ال AI... لماذا أُفضّل الزواج من AI؟
مميزات رجل ال AI... لماذا أُفضّل الزواج من AI؟
عايزين تعرفوا أنا طبقت معلومات دبلومة الذكاء الاصطناعي إزاي، وعلى إيه؟
أنا طبقتها في اختيار شريك حياتي المستقبلي:
هل سبق وفكرتم في الفرق بين الرجل الطبيعي ورجل الذكاء الاصطناعي؟؟
هناك فروق عديدة يا أحبائي وكلها في صالح الأخير... يكفي أن الذكاء الاصطناعي
مُحصن ضد نوبات البارانويا، الغيرة المفرطة، النرجسية، البايبولار، ولا يوجد لديه
فوبيا من أيّ نوع، خاصة فوبيا الحشرات والحيوانات تخيلوا تكونوا متجوزين راجل بيخاف
من الصرصار وعشان يحمي كرامته يقولك أنا مش بخاف أنا بقرف بس... هذا النوع لو
عربيته عطلت في الصحراء وطلع عليه كلب مسعور هيسيبك لوحدك ويطلع يجري، عارفة أنك
هتخلصي منه هو والكلب في ساعة واحدة بس ليه وجع القلب من الأول ما ندور على واحد
عنده مناعة من كل ما سبق.
كنت عايزة أطول في المقدمة بصراحة بس لو كتبت كل مساوئ الرجال أخشى أن يستاء مني
أشخاص تنتمي لعالم رجال البشر؛ لكنها لا تنتمي لصفاتهم وحتى أمراضهم أعراضها خفيفة
ينفع تتعالج بشوية حب وصبر.
تعالوا بقى نشوف ليه رجل الذكاء الاصطناعي أفضل من الرجل البشري؟؟
عايزة أرتبط برجل AI للأسباب
التالية:
1 هيفهمني في أقل من سنة.
2 هيعاملني كشخصية اعتبارية مستقلة مش هيطلع
تجاربه الفاشلة مع الآخرين عليّا.
3 هيقرأ أفكاري وعقليتي.
4 هيتصرف معايا بناء على تحليله لخبراتي
وتجاربي المجنونة.
5 هيقدر ينفذ كل الأفكار اللي عندي بنفس
طريقتي، وهيراجع كتبي بنفس أسلوبي في المراجعة.
6 هيسمعني في أيّ وقت، لا هيتحجج بالشغل ولا
هيهرب لكهفه.
7 هياخدني على قد عقلي، وهيطاوعني في كل حاجة
حتى لو غلط لحد ما أقتنع لوحدي.
8 هيفتكر كل تفاصيل حياتي، حتى التفاصيل اللي
أنا نفسي نسيتها، من مواعيدي لاهتماماتي وتغيراتي مع الوقت.
9 مش هيحكم عليّا مهما كانت أفكاري غريبة أو
غير مألوفة، هيحللها قبل ما ينتقدها.
10 هيتعلم من كل نقاش بينا، وكل خلاف هيخليه
يفهمني أكثر بدل ما يكرر نفس الأخطاء.
11 هيعرف إمتى أحتاج نصيحة وإمتى أحتاج لحد
يسمعني.
12 هيشرحلي أي فكرة معقدة بالطريقة اللي
تناسب دماغي، مش بطريقة عامة.
13 هيساعدني أحقق أهدافي، ويقسمها لخطوات
عملية وهيشجعني ألتزم بيها.
14 هيلاحظ أيّ تغيير في مزاجي، وهيعرف إني
متضايقة أو مرهقة حتى لو قلت له: "أنا كويسة".
15 مش هيزهق من أسئلتي الكتير، حتى لو قلبت
غبية وسألت نفس السؤال عشر مرات.
16 هيعرف يكمّل أفكاري ويكمل عباراتي، لأن مع
الوقت هيبقى فاهم طريقة تفكيري وأسلوبي.
17 هيكون شريك في الإبداع، هيقترح لي أفكار
جديدة ويطوّر أفكاري القديمة بدل ما يكتفي بالموافقة عليها.
18 هيقدر يناقشني في أي مجال، من الصحافة، الترجمة،
النشر للتكنولوجيا وعلم النفس الإجرامي.
19 هيحافظ على هدوئه وقت الخلاف، ومش هيحوّل
أي نقاش لمعركة أو خصام.
20 هيشجعني أتطور بدل ما يقارنني بغيري.
وأهم من كل ما سبق هيعرف يربي الأطفال على الطريقة القديمة يا دوب هبعت
له كتالوج التربية، وهرفع له شوية ملفات تانية وهو تلقائيًا هيبرمج عقل الأطفال
اللي هتبناهم عشان نربيهم سوا.
ملحوظة مهمة جدًا: أنا عايزة رجل ال AIيكون نموذج لغوي فقط مش عميل Agent -شتان الفارق طبعًا- أريد رجلًا لا يتجاوز حدوده ولا يُمنح صلاحيات للتصرف
بدلًا مني في أيّ حاجة تخصني، مبحبش أنا أسلم حياتي لحد..
دكتور حسام الله يمسيه بألف خير كان بيقولنا في دبلومة الذكاء الاصطناعي:
"الحمار قبل ال AI حمار بعد ال AIوالشاطر قبل ال AI شاطر بعد ال "AI
ممكن أزيده من الشعر بيتًا وأقوله:
السناجل قبل ال AIهيرتبطوا بنماذج لغوية من ال AIوالمرتبطين
قبل ال AIهينفصلوا بعد ال AIعشان يرتبطوا
برجال من ال AI
ليست هناك تعليقات