حكايا الطريق 1

 

حكايا الطريق 1

ف برنامج اسمه أغرب القضايا تسمعوا عنه؟ أهو أنا بقى هعمل برنامج عن أغرب المعاكسات؟ خلوني أبدأ بالظابط المجنون اللي عاكسني وأنا راجعة مع بابا يوم تقديم ورقي في الجامعة، بص لي وبص لبابا وقال لبابا: "أنا إيه اللي خلاني أتجوزت بدري وفوتت العسل ده؟".

في رحلتي للساحل بقى ضحك السنين، عدينا ع استراحة اسمها، ولا بلاش اسمها عشان محدش يروح يضربهم هناك -بحثًا عن الشخص التالي ذكره- رحت أشتري نسكافية لاقيته بص لي وضحك، وقالي: "يارب تتجوزي واحد شبهي" أنا قلت يمكن بيكلم حد تاني أنا مش لابسة النظارة وحتى لو لابساها الأمر سيان ف كلتا الحالتين مش بشوف بيها، المهم قالي: "قولي أمين، ولا أنا مش حلو والله ماما بتقولي ربنا راضي عنها اللي هتجوزك رديت عليه وقلت له: "وأنا ماما بتقولي ربنا يكون ف عونه اللي هيتجوزك" المهم متأثرش وقالي: "ربنا يرزقك بواحد كل همه في الحياة يخليكي تضحكي عشان يشوف ضحكتك... تتجوزيني وأغسلك المواعين؟!!

في تلك اللحظة يا سادة أنا حبيته فاكرين من أسبوع لما كنت بندب وبقولكم أنا بكره غسيل المواعين؟"... حسيت وقتها أنه لمس قلبي، وهنا ع الفور قلت له: "موافقة طبعًا إزاي أرفض عرض مُغري زي ده".... وفضل الباشا يديني باقي فلوسي ع مراحل لدرجة إني شكيت وقلت ف نفسي يمكن بيعطلني عشان زميله يزرع قنبلة ف الباص بتاعنا؟!!

المهم رحت الساحل ومصدقت ألاقي أطفال تحت 12 سنة قعدت معاهم، وفضلنا نحكي عن كل شيء لاقيت واحدة منهم بتقولي: "أنتي متواضعة أوي يا طنط" بغض النظر عن كلمة طنط إلا إني كنت سعيدة لحد أما سألوني سؤال موجع أووي، قالولي: "فين ولادك مش شايفينهم؟"

يا نهار سواد!! ولادي؟!! هو لحق الوقت يجري بسرعة أووي كده دا لسه الراجل متقدم لي مكملش ساعتين، دا أنا حتى معرفش اسمه معقولة الجنان ده؟!! يكونش سبت ولادي عنده ف الاستراحة ورحت انا لوحدي أتفسح؟! شككوني ف نفسي والله، المهم محوت عنهم الفكرة دي وقلت لهم: "أنا مش متجوزة ومعنديش ولاد كان بودي والله بس الحمد لله ع كل شيء"... طبعًا اتصدموا من هول المفاجأة وكأن ف قانون بيحرم وصول أيّ امرأة في الكوكب لسن الثلاثين فيما فوق بدون أطفال بيقولوا لها يا ماما، كنت حاسة من ملامحهم انهم هيبلغوا عني بتهمة كسر قوانين الطبيعة.

قبل ما نمشي لاقيت واحدة منهم جايالي وبتقولي: "أنا حبيتك أووي يا طنط تسمعي عن تلاقي الأرواح؟!" أنا قلت ف سري "تلاقي أرواح أيه هي حصلت!" قلت لها: "اسمع عنها طبعا" ردت: "أهو أنا حسيت بده أول ما شفتك حبيتنك وحسيت إني اعرفك من سنين أنتي بردو حسيتي نفس إحساسي ده صح؟" قلت لها: "طبعًا، دا أحلى حاجة ف اليوم إني اتعرفت عليكم".

نستخلص من ذلك إيه يا سادة؟؟ أن الشعب المصري عنده حرمان عاطفي لدرجة أنه ممكن يحب أيّ حد من أول نظرة، بس بعيدًا عن الضحك والهزار أحنا فعلًا موجوعين أووي ومحتاجين حد يسمعنا ويضحك معانا، محتاجين نشوف كل اللي قريب مننا ونحضنه ونتكلم معاه عشان مصر مش بتعيش أزمة اقتصادية بس، مصر عايشة من سنين في أزمة عاطفية كبيرة.