للرجال فقط... فهم النساء أشبه بحالات الانتحار في نهر هان

 

للرجال فقط... فهم النساء أشبه بحالات الانتحار في نهر هان

هل تعرفون كم عدد حالات الانتحار في نهر هان؟؟ العدد يزداد يوميًا لدرجة أن الجسر الشامخ الذي يربط بين ضفتيه، والمعروف باسم "هانغانغ" قد تغير اسمه وأصبح مشهورًا الآن بمصطلح "جسر الانتحار".. ما علاقة كل هذا بالنساء والرجال؟؟

الانتحار في نهر هان أهون بكثير من محاولة اكتشاف المرأة، على الأقل بعد الانتحار -لو رقبتك متكسرتش بعيد الشر عنك طبعًا- قد تنقذك دوريات الإنقاذ ويتكتب لك عمر جديد، ولكن لو حاولت تفهم النساء سيكون الموت هو مصيرك الحتمي أو لو ربنا نجدك ستُصاب بأعراض اكتئاب مزمن يصحبها حالة من التخلف العقلي، يعني يا هتتجنن يا هتموت بردو بعد ما تقطع شرايينك.

المقالة دي عايزة اكتبها من فترة طويلة بس شاءت الأقدار اكتبها لكم النهاردة... الأسرار الغريبة في الكون بتستهويني، فبقيت مدمنة ع فيديوهات النفس البشرية، المهم وقع في إيدي فيديو بيتكلم عن "إيه الصفات اللي بينتبه لها الرجل في أيّ امرأة يصادفها لأول مرة"... أنا هقولكم وجهة نظره "بصفته خبير يُعبر عن أفكار بنو جنسه" وهرد عليه بصفتي من نساء الكوكب -مع الأسف جزء مني لا يزال ينتمي لعالم البشر حتى الآن- خلونا نبدأ بأول حاجة قالها.. (ملحوظة: الأرقام كلامه هو، والأسهم تعليقي على كلامه)
1-النميمة، خاصة بشأن النساء الأخريات

وجهة نظره أن الرجل لا يحب المرأة اللي بتغتاب الآخرين، خاصة النميمة على امرأة أخرى، وقتها بيحس أن هيجي يوم تتكلم فيه عنه بتلك الطريقة أو تفضح أسراره.

◄في البداية يجب توضيح معلومة مهمة جدًا، وهي: النساء الآن لا تملك وقت للتحدث عن توافه الأمور، فقط الموضوعات الغريبة، الخارجة عن نواميس الكون تقف عندها لبرهة، ومع صباح اليوم التالي بيكون عندها مشاكل أهم بتسيطر على تركيزها.

◄ملحوظة مهمة جدًا: النساء لا تغتاب النساء، النساء تهوى التحدث "بالسوء" عن الرجال، خاصة لو كانت بتحبه؛ فكلما زاد حبها له كلما اخترعت أشياء سلبية عنه -من العدم- عشان تناقشها، هوايتها في الحياة تجيب سيرته في أيّ نقاش حتى مع الحاجة اللي قاعدة جمبها في العربية.

2-متابعتها على السوشيال ميديا، ورأيه في نشر صورها.. الرجل يعتقد أن تصرفها هذا الغرض منه جذب انتباه المتابعين أو الآخرين إليها، وخاصة الرجال.

◄النساء بشكل عام بينجذب إليها الجنس الآخر بالفطرة، وبدون أي مجهود منها؛ فحتى لو كانت من النوع اللي مش بينشر يومياته ولا صوره على الفيس بتكون غامضة أكثر وبتلفت انتباه الرجل أكثر لأن الرجل فضولي بطبعه والمرأة الغامضة بتجذبه أكثر لأنها بتخليه طول الوقت يفكر في كيفية فك طلاسمها، وبالنسبة للنوع اللي بينشر يومياته على الفيس وصوره مش قصده يلفت الانتباه على الإطلاق ولا يستعرض حياته الوردية، هو بيحاول يخبئ مدى حزنه فبيحاول يفرفش نفسه بالطريقة دي... أنا ساعات كتييير جدًا بكتب منشور رومانسي وأنا هدفي في الأساس أكتب منشور ألعن فيه البشرية والكوكب بس بحاول أهدي نفسي وأشتت تركيزي بالمنشور الرومانسي ده.

3-رائحة واحدة مميزة أفضل من مزيج جميل من الرواح: يعني رائحة الشامبو والشاورجيل، والكريمات...الخ تكون كلها نوع واحد

◄حضرتك النساء مش فاضية تركز في نقطة الوسواس القهري دي، يعني مش بتحط ف دماغها تنزل البيوتي سنتر وتجيب شامبو بريحة شجر البامبو وشاورجيل بامبو، وكريم بامبو وبلاشر بامبو وأيلاينر بامبو... إيه الجنان ده أحنا مهووسيين بالجمال آه بس مش للدرجة المريضة دي.

4-المكياج: الرجال لا يحبون مكياج مبالغ فيه؛ فكلما كان أبسط كلما كان أفضل

◄والآن اسمح لي يا سيدي أهديك أغرب معلومة ستسمعها عن معشر النساء، وهي: 90% من النساء لا تضع مكياج للفت الانتباه بل لإخفاء ما يلفت الانتباه إليها...هالات سوداء مثلًا، بشرة باهتة...الخ، أنا شخصيًا بدأت أحط مكياج عشان الدكاترة عقدوني، كل أما يشوفوني يقولولي: "شفافيفك بيضاء ووشك مجهد.. الحديد زيادة يا أستاذة والهيموجلبين ضايع"... فقررت أتحايل على الكوكب والدكاترة وأخفي حقيقتي المتمثلة في كوني مصاص دماء.

 الأغرب من ذلك أن بعض النساء ترتدي أشياء غريبة جدًا للتستر على حالتها النفسية، قد تكون في قمة الأناقة اليوم وفي الغد ستجد ملابسها تبدلت 180 درجة.

5-أصدقائك: الرجل يراقب بسرية من هم أصدقائك؟؟ مع من تمضين وقتك؟؟؟

◄معه حق تمامًا في ذلك "المرء على دين خليله" ولكن احذروا من نظرية الأقطاب المتشابهة والأقطاب المختلفة... ستجدون مثلًا امرأة خجولة جدًا وصديقتها اجتماعية جدًا أو قد تجد كل أصدقائها شبهها (في الحالة دي متقربش أووي من صحباتها عشان هتحبهم زي ما حبتها، ومتقربش منهم بردو لو كانوا مختلفين عنها عشان هتحب فيهم اللي مش موجود فيها).... يعني ملخص الحكاية لا تقترب من أصدقائها، لو كنت بتراقب أصدقائها عشان تطمن عليها في غيابك يبقى سيبها من دلوقتي لأنك في الحالة دي بتشكك في اختياراتها وقدرتها على حماية نفسها من أصدقاء السوء... ولو قلت كلام سيئ عن أصحابها هتقولك ببساطة: "ع فكرة انا اخترتهم قبلك، يعني لو كان اختياري ليهم غلط فده معناه إن اختياري ليك أنت كمان -بالتبعية- غلط.. يلا بالسلامة طريقك زراعي، وخلي بالك من نفسك عشان في مقطورات بيخبطوا ف بعض وبياخدوا ف سكتهم 20 عربية ملاكي"

6-علاقتك بأبيكِ: كيف تتحدثين عنه؟؟ وكيف تشعرين تجاهه؟ يترجم الرجل حب المرأة لأبيها لإشارات جيدة؛ فتحدثها دومًا عنه بكل ما هو طيب يعكس معدنها وكيف ستعامله هو في المستقبل.

◄لا توجد ابنة لا تعشق أبيها إلا لو كان الأب ده لا يستحق حبها، يعني أب خاين مثلًا، أب أناني، أب بخيل، أب بيضربها، وقتها كلامها عنه بالسلب مش معناه أنها هتتربص بيك أنت كمان وتخلي عيشتك سودة، بالعكس طالما مخربشتش القطة مش هتقربلك... مشكلتكم أنكم بتشوفوا الأمر من برا من غير ما تعرفوا كواليس الحقيقة... يا رجال الكوكب "النساء ردّ فعل مش فعل" يعني لو حبيتها هتحبك، لو كان والدها رجل طبيعي هتحبه أكثر منك ومن البشرية؛ لكن متقولش "إزاي تكرهي أبوكي يا هانم، وإزاي تقولي الكلام دا كله عنه، أحنا كده مش هنعرف نكمل حياتنا سوا عشان اللي مبتحترمش أبوها يبقى مش هتحترم جوزها"... هي في الأول هتبص لك بشفقة، وبعدها هترد عليك -بكل برود- وهتقولك: بألف مليون سلامة يا حبيبي لو هتطلع خاين أو أناني أو بخيل زيه ومنتظر بعد كل ده أعاملك بالحسنى اسمحلي أقولك:

 Öyle bi dünya yok yok yok""

على فكرة دي مش شتيمة.. دي جملة تركي معناها بالعامية "مفيش الكلام ده" وبتدي بردو نفس معنى المثل المصري "في المشمش"

7-كيف تتصرفين مع التحديات والعقبات: الرجل يريد المرأة التي تواجه المشكلات وتحلها بحكمة وثبات.

◄الجملة دي غير صحيحة؛ لأن سيكولوجية أغلب الرجال بتميل ناحية المرأة اللي بتحسسهم بقيمتهم، اللي بيحسوا معاها أنه بطل جسور استطاع بحنكته وخبرته الواسعة وقوة عضلاته التغلب على وحوش بحيرة التنانيين، وبصفة عامة الرجال بتهرب من المرأة المُسيطرة، القوية اللي بتمشي أمورها من غيره، بمعنى أدق مبيحبش المرأة اللي بتحسسه بدور "البوليس المصري في الأفلام القديمة" مش بيحبوا يقبضوا على المجرم ع الجاهز، لازم يحسوا أنهم قاموا بدور كونان وكلبش في القبض على المشكلة، وحلها من جذورها.

◄لكن نرجع نقول بردو أن كلامه صح جدًا (في حالات معينة) مع الرجل الواثق جدًا في نفسه ونجاحاته وشخصيته مالية عينه، وحبه ليها مش بيخليه يفكر التفكير السطحي ده ويغير منها أو يزعل أنها خلصت الموضوع ومطلبتش مساعدته، بالعكس دا بيكون فخور بيها وممكن كمان يفوضها عشان تحل معاه شوية مشاكل خاصة به سواء في شغله أو في أي جانب آخر من جوانب حياته.

في الختام أكرر "أنا لا أنقد شيء لا أحبه" وكوني تحدثت عن فيديو «إسماعيل غوميز» فده أكبر دليل أنه نجح يخليني اهتم بمحتواه لدرجة إني أفكر فيه وأرد عليه... لو عجبني فيديو تاني من فيديوهاته هناقشها معاكم قريبًا بإذن الله..

تذّكروا دومًا أن الحياة أسعدتكم وستسعدكم مجددًا(;