الأمم المتحدة تحذر: عشرة رجال يجب إبادتهم فورًا

 

 

 

الأمم المتحدة تحذر: عشرة رجال يجب إبادتهم فورًا

 

عزيزي القارئ لو كنت متوقع أن المقالة سياسية فمن الأفضل مغادرة الصفحة الآن، كما نحيط سيادتك علمًا أن المقالة موجهة للنساء على الرغم من وجود كلمة "رجال" في عنوانها.

قبل البدء في تنويه هام جدًا، وهو:

·      هناك مقالة أخرى ستتحدث عن عشرة نساء يجب إبادتهن، وتلك المقالة ستكون موجهة للرجال والنساء في أنٍ واحد؛ فالنساء قادرات على إيذاء النوعين معًا بمنتهى السهولة.

·      هدف المقالة ليس التجريح في الأنواع العشرة من الرجال الذين سنتحدث عنهم إنما هدفنا الأوحد هو حماية أطفال المستقبل من خطر التفكك الأسري أو وقوعهم ضحية لأب سيئ وأم لم تُحسن الاختيار.

 

·      النوع الأول: البخيل الوقح البارد

عزيزتي هل شاهدتي مسلسل الوتد من قبل؟ الفنان فتحي عبد الوهاب قام بدور "صلاح" في المسلسل، الدور ده هو خير مثال على شخصية النوع الأول -البخيل الوقح البارد- طريقته وهو بيكلم الحاج درويش "يوسف شعبان" لما راح له داره بالليل عشان يقوله هما اللي مش عايزني يبقى مش هدفع لهم حاجة، في حين أنه ساب مراته حامل -مع حماتها- من غير فلوس وكانت هتموت وهي بتولد عشان أمه خلتها تشيل شوالين كان فيهم رز تقريبًا.. دا أول نوع يجب إبادته عشان ميأثرش على سلالة الكوكب لو الله لا يقدر جاب لنا ولد يشبه في صفاته.

 

·      النوع الثاني: الكذاب

الكذب دليل على الشخصية الضعيفة الجبانة، النوع ده مستحيل هيخليكي تثقي فيه أبدًا لأنك طول الوقت هتشكي في كلامه حتى المرة الوحيدة اللي هيقول فيها الحقيقة هتبقى حقيقته مشوهة أشبه بالدعاية الرمادية اللي فيها خبر واحد بس صح مع عشرين خبر غلط.

 

·      النوع الثالث: الفرفور

النوع ده كان موجود في فيلمين وللصدفة البحتة كان الفنان يوسف وهبي هو الأب اللي بيحمي بناته منه، أولهم سعاد حسني في فيلم إشاعة حب: "مين دي يا سميحة؟؟ زميلتك بردو؟؟"... "دي إيه يا بابا دا ولد دا لوسي ابن طنط فكيهة"... المرة الثانية كانت ميرفت أمين في فيلم البحث عن فضيحة "لا يا أنكل أنا كنت لابس جيميز بدانتيل" دا بقى ريكو اللي كان زعلان إنه خسر في مسابقة الرقص رغمًا عن الدانتيل المغري اللي كان لابسه.. طبعًا مش محتاجة أوصيكم أننا نبعد تمامًا عن النوع المخنث ده على الأقل حفاظًا على سمعتنا مش معقول هنحضر أيّ فاعلية اجتماعية وماسكين إيد واحد زي لوسي أو ريكو، أو تخيلوا مثلًا ماشين احنا الاتنين في الشارع وشوية متحرشين عاكسوه هيبقى موقفي إيه وقتها؟؟ هروح القسم أقول للظابط إيه إتحرشوا بجوزي!!

 

·      النوع الرابع: المحترم والحساس بزيادة

تخيلوا تقابلوا رجل زي عمالقة العصر الحجري وقلبه قلب خساية ممكن يموت منك لو شاف حادثة على الطريق أو دماء على الأسفلت أو تقابلوا حد محترم زيادة عن اللزوم يستأذنك كل شوية قبل ما يعمل حاجة خوفًا على تجاوزه الحدود ممكن مثلًا يقولك هو أنا ممكن قبل ما ندخل السينما أعدى أجيب فشار لو مش بتحبي الفشار خلاص أنا أسف مش هعمل كده تاني.. أنا عارفة بنات الثانوية العامة والجامعة بتحب الأنواع دي متخيلين أنهم "مراعيين" وبيسمعوا الكلام وسهل ترويضهم.. الخ هذا العبث؛ لكن مع الوقت النوع ده يا هيجيبلكم ساكتة قلبية يا هتقتلوه يا هتروحوا السرايا الصفراء بسببه.

 

·      النوع الخامس: الخبيث

يؤسفني أخبركم أن المقالة دي من واقع مشاهدتي لتلك النوعيات على مدار ربع قرن، وبسبب هؤلاء العشرة أنا قاب قوسين أو أدنى من قتل أحدهم قريبًا.

زمان قبل ما يتحول قسم علوم الإتصال والإعلام لكلية إعلام كنا -كطلبة- بندرس الشق الأول من اسم القسم "علوم الاتصال" بالعربي والإنجليزي بمواد مختلفة أكثر حتى من مواد الصحافة والإذاعة والتليفزيون، وده مع الأسف أزال الغبار عن صفة سودة فيا خلاني أعرف اقرأ العيون قبل الكلمات، الصفة دي بتعكر معدتي كل أما بقابل واحد بيسرح بيا أو حد خبيث.. دول أول ما بشوفهم عقلي بيردد على طول "ربنا أفرغ علينا صبرًا".. تعرفوا إيه الأخطر من كونه خبيث؟؟ أنه يكون مُدعي خبيث يمثل أنه دبلوماسي وأنه خايف على مصلحة البشرية والكوكب وهيرشح نفسه سفيرًا للنوايا الحسنة وهو نواياه سودة كل جملة منه وراها خطة شريرة وثعالب بتدور في دماغه.

 

·      النوع السادس: النرجسي

الباشا ده أشهرهم لأن خبيري العلاقات بيحذرونا منه من حزيران 1904، مش هقولكم على صفاته بس هتلاقوه كده فخور بنفسه، حاسس أنه محور الكون والشمس والقمر يدوران حوله، طبعًا لازم جدًا تحسسيه أنه الملك المتوج على عرش الكرة الأرضية وأن كل البنات بتحبه وحتى الرجالة بيغيروا من طلته البهية، بيبقى عايز دائمًا الناس تحافظ عليه وعلى مشاعره في حين أنه عديم التعاطف أصلًا البشر بالنسبة له عبارة عن كائنات لا أهمية لها، هما موجودين فقط عشان يدينوا له بالولاء والطاعة والحب الغير مشروط.

النوعية دي محتاجين نتخلص منها ليه يا هبه ما هو كيوت أهو احنا بنحب الرجالة المغرورة متوجعيش دماغنا بقى أنتي كده كرهتينا في نص رجالة الكوكب..

استنوا لسه القائمة مخلصتش أوعدكم هتكرهوا النص التاني قبل نهاية المقالة بس خلونا نرجع للنرجسي.. أنا عارفة أنك لو وقعتي في حب نرجسي هتقدري تستحملي غروره وغطرسته وأنانيته عادي؛ لكن هل هتقدري تستحملي تصرفاته مع ولادك "ولادكم"؟؟ مش هتقدري.. لأن الأستاذ ده أناني لدرجة أنه مش بيفكر في حد غير نفسه، غير راحته ورفاهيته هو بس، دا من النوع اللي هيسيب ولاده جعانين وهتلاقيه عايش حياته بالطول والعرض، ممكن ابنه يكون مش لاقي الدواء وبيموت، وهو متجوز واحده يونانية وعايش حياته ولا على باله... أصدمك؟؟ أنا شفت النوعية دي على الحقيقة، والأمثلة دي من واقع تصرفاتهم مع ولادهم، الأول دمرّ نفسية كل ولاده، والتاني ابنه تدهورت حالته الصحية وبنته كرهت كل الرجالة وكرهت الجواز بسببه.   

 

·      النوع السابع: الإتكالي/ غير المسؤول

كلنا سمعنا مصطلح "ابن أمه" وكنا متخيلين إن الشيء الوحيد السلبي في كونه "ابن أمه" هو: دلعه، تعلقه بوالدته، وقوفه في صفها دايمًا.. الخ.

للأسف لو كانت تلك الصفات فقط موجودة فيه كان زمان نساء كتير قدرت تحل تلك المشكلة؛ لكن المصيبة الأكبر في كونه ابن أمه ليست دلاله الزائد أو كونه إمعة بيسمع كلام أمه فقط إنما مشكلته الحقيقية تكمن في كونه إتكالي لا يتحمل المسؤولية، من الأخر هتكوني أنتي راجل البيت بداله لو وقع في أزمة مالية مثلًا بعد وفاة والدته هيخليكي أنتي اللي تحلي الموضوع، هيفضل يعمل مشاكل في الشغل ومع أهلك وحتى في الشارع وهتصلحي أنتي وراه، طبعًا كل ده بخلاف إهماله لأطفاله يعني مش هتلاقي أب يروح يحل مشكلة في المدرسة أو يساعد في مذاكرتهم "أومال إنتي دورك إيه يا هانم أنا مش كفاية عليا بروح الشغل عايزاني كمان أرجع أذاكر لولادك؟!! ناس معندهاش دم ولا بتحس".. بيت القصيد يا آنستي هيبقى عندك طفل مدلل في البيت مش بيعمل حاجة في حياته غير زيادة أعبائك المالية والنفسية، وهيجيب أجلك بتصرفاته.

 

·      النوع الثامن: المريض النفسي

تخيلوا تكونوا عايشين مع شخص بيهوى "الإسقاط".. يعني عمره ما بيطّلع نفسه غلطان، لو عمل مصيبة لازم هيخليكي أنتي اللي تحسي بالذنب بيطّلع كل عُقده عليكي، يكون خاين مثلًا فيتعامل معاكي وكأنك خاينة زيه أو إن أنتي اللي خليته يوصل للمرحلة دي، يفلس في مشروعه فيقولك ما هو كله منك، أنا لو كنت عايش في بيت هادي مع واحدة بتفهمني وبتدعمني مكنش دا كله حصل..

خلي بالك المريض النفسي مش اللي كلمتك عنه بس، المريض النفسي ده ممكن يكون عنيف بيحس أنه راجل لمّا بيضربك أو نوع سادي بيستمتع بتعذيبك نفسيًا أو جسديًا أو نوع غيور بزيادة أو عنده جنون ارتيابي ممكن يشك فيكي لو رديتي على التليفون وطلع الرقم غلط والمتصل راجل، أو لو ضحكتي مع ابن عمك الأصغر منك بعشرين سنة.. في بردو المتشائم على طول اللي شايف كل حاجة سودة أو القلقان دومًا اللي لو سمع مثلًا أن سمك التونة هينقرض هيفضل متنح جمب التلفزيون وهتلاقيه فجأة تقمص شخصية رامي قشوع في بطل من ورق، وقعد يندب وينوح: "يا سنة سوخة يا ولاد" وممكن يصحى الصبح يروح وزارة البيئة ويطمن بنفسه: يا جماعة هو لسه في سمك في الكوكب ولا كله انقرض؟!

 

·      النوع التاسع: النمطي/ عديم الشخصية

عارفين مصطلح "الإنسان العادي"؟؟ هاكل عادي هدرس عادي هشتغل عادي هتجوز عادي هخلف عادي هموت عادي.. إنسان عديم الشغف عديم الحياة عديم الروح عديم الشخصية، النوع ده هتلاقيه ماشي جمب الحيط بيستحمل إهانة اللي يسوى واللي ميسواش بحجة مش عايز أأذي أبويا وأمي، مش عايز أأثر على دراستي مش عايز أترفد من شغلي...الخ، هتلاقيه خايف حتى يتخانق مع أولياء الأمور اللي ولادهم ضربوا ابنه واتنمروا عليه في المدرسة.  

 

·      النوع العاشر: الخاين

عارفين إيه الفرق ما بين الخاين والدنجوان متعدد العلاقات؟؟ أن الأخير واضح وصريح والعالم كله عارف أنه بيتجوز ويطلق يحب ويهجر، كل البنات بتحبه كل البنات حلوين.

لكن الخاين هو اللي بيدعي الوفاء والإخلاص وعامل نفسه زوج مثالي وهو متجوز مرتين في السر على مراته.. دي الخيانة الزوجية نروح بقى للأنواع التانية من الخيانة خيانة الأمانة واحد يكون مستأمنك على مستقبل ابنه فبدل ما تعلمه بما يرضي الله وتحلل فلوس الدرس تقوله افتح الكتاب يا بني واحفظ السطرين دول وروّح ومتنساش تجيب فلوس الحصة معاك المرة الجاية، خيانة الثقة، خيانة العهد، خيانة الدم ودي أسوأهم أنك تخون أقرب الناس لك إخواتك، أهلك زي ما قال الفنان سعيد صالح الله يرحمه في نهاية مسرحية العيال كبرت "تبيع اللي يسوا عشان خاطر اللي ميسواش".

 

الخاتمة..

الحمد لله وصلنا لآخر محطة كنت متخيلة أن القايمة دي مش هتخلص النهارده، أقولكم على حاجة المقالة دي تعبت نفسيتي لسبب غريب جدًا: حاسة أن في أنواع تانية عايزة إبادة لسه متكلمناش عنها، بس دعوني أسألكم سؤال هو لسه في رجالة في الحياة لا ينتموا للأنواع اللي اتكلمنا عنها؟؟ الحمد لله لسه في قلة قليلة بعيدة كل البعد عن الأنواع دي، ربنا يحفظهم من شر العدوى ويكتر من أمثالهم.. سامعة النساء بتقول أمين، والرجالة في منهم بيضحك وفي منهم بيشتم ودول ع الأغلب الأنواع اللي اتكلمنا عنها ومش عاجبهم الكلام، وبيتهموني إني مُعقدة مُختلة.