معركة الانتحار المُبرر بالموت الرحيم... وانتصر الرز بلبن في النهاية

 

 

 معركة الانتحار المُبرر بالموت الرحيم... وانتصر الرز بلبن في النهاية

البشر ليسوا معصومين من الفتن؛ لذا نردد دومًا هذا الدعاء: "اللَّهمَّ اقسِم لَنا من خشيتِكَ ما يَحولُ بينَنا وبينَ معاصيكَ، ومن طاعتِكَ ما تبلِّغُنا بِهِ جنَّتَكَ، ومنَ اليقينِ ما تُهَوِّنُ بِهِ علَينا مُصيباتِ الدُّنيا، ولا تجعَل مُصيبتَنا في دينِنا".

أتدرون ما أصعب شيء في تلك الحياة؟؟؟ أن عدوك يلاقي المدخل الصح للقضاء عليك... أن يكون الإنسان لديه ثقة كبيرة في الله وفي بينه وبين ربه عمار لدرجة إنه بيلجأ له في كل شيء في حياته، وعمره ما بيشك ولو للحظة أن ربنا ممكن يخذله، ومش بيخاف من حاجة في هذا الكون سوى الوقوع في المعاصي وظلم الآخرين أو الانحراف عن الطريق المستقيم؛ فيكون متخيل إن الشيطان مش هيغويه... معقولة هيسيب العاصي ويغوي العابد؟؟؟ ميعرفش إن أكبر إنجازات اللعين هي إغواء الفئة اللي بتخاف من صغائر الذنوب... هتلاقيه بيقولك: ربنا بيحبك لدرجة أنه حاسس بكل شيء بتمر به وعارف أن أيّ قرار هتاخده -حتى لو كان قرار الانتحار وقتل النفس- أنت معاك حق فيه لأنك استحملت وصبرت كتير، وإيه هيحصل يعني لما تقتل نفسك ما أنت عشت حياتك كلها محبوب من الجميع وبتتقي ربنا في اللي يسوى واللي ميسواش...الخ المبررات المُقنعة التي تُريح قلبك وتجعلك تذهب بكل هدوء وثبات لأقرب آلة حادة وتُمسك بها لتنحر عُنقك أو تشق بها شرايين معصمك.

تعالوا أحكي لكم حوار الشيطان معي البارحة:

-       عزيزتي أليس من الواضح أن الأمور كل يوم بتزداد سوءًا... لماذا التأجيل إذن؟

·      أقتل نفسي؟ أموت كافرة؟ دا أنا اللي بقول للناس متيأسوش، أنا هدفي في الحياة أنقذ الناس أنا كده هبقى بخون نفسي وعهدي قبل ما أخونهم إزاي تفكر في كده؟!!!!

-       أنتي مصدقة الكلام اللي أنتي بتقوليه ده؟ بقى دي هبه اللي كتبت إمبراطورية زركون دا أنتي بقيتي بتلعني في البشرية اللي كنتي بتحبيها في 2018، بلاش البشرية الناس اللي خايفة عليهم أووي مش على بالهم أصلًا أيّ حاجة حلوة عملتيها لهم... البشر يا حبيبتي ناكرين للجميل.

·      معاك حق بس بلاش تعمم أنا اللي مكرهني في حياتي ناس تتعد على الأصابع مش كتير أوي يعني هعرف أتصرف معاهم.

-       تتصرفي مع مين!!! والله ضحكتيني، يا بنتي أنتي لحد دلوقتي متصرفتيش مع حد وعشان كده لسه بيستحلوا تعذيبك، وبيستبيحوا استنزافك... تقدري تقوليلي مين اللي وصلك للحالة دي؟ مش أغلبهم -إن مكنش كلهم- ناس بتحبيهم وبتحترميهم؟!! ده معناه أن مشاعرك فيها مشكلة وأفكارك كمان ولو استمريتي في حياتك بطريقتك دي هتعيشي طول عمرك في عذاب؛ فليه متوفريش على نفسك الوقت وتريحي نفسك بدري بدري من الدنيا وما فيها.

·      طيب لو قتلت نفسي مش هتحاسب؟ (وقتها سمعت صوت الإمام في الجامع بيردد آية "قُلْ يَا عِبَادِيَ الَّذِينَ أَسْرَفُوا عَلَىٰ أَنْفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ")

-       شفتي يا ستي أنتي بتؤمني بالإشارات صح؟ أهي دي إشارة أن ربنا هيغفر ذنوبك لأنه بيغفر الذنوب جميعا... إيه رأيك بقى في السكينة الحمراء المشرشرة؟؟ حلوة وحامية ومش هتخليكي تحسي بحاجة، بلاش تقطيع شرايين ممكن ينقذوكي احنا نركز مع الأوردة الرئيسية أنتي عارفة مكانها كويس، أمسكي بس السكينة وافتكري آخر جملة عصبتك وتخيلي الوريد ده كأنه الباب اللي رزعتيه أو الدولاب اللي كسرتيه.

·      طب استنا أخلص طبق الرز بلبن وكوباية القهوة هموت على معدة فاضية؟!!!! الله يلعنكم جميعًا (شوية وقبل ما الطبق يخلص وأنفذ مهمة الانتحار سمعت الإمام بيكمل باقي آيات سورة الزمر لحد ما وصل للآيتين 55، و56: ]وَٱتَّبِعُوٓاْ أَحۡسَنَ مَآ أُنزِلَ إِلَيۡكُم مِّن رَّبِّكُم مِّن قَبۡلِ أَن يَأۡتِيَكُمُ ٱلۡعَذَابُ بَغۡتَةٗ وَأَنتُمۡ لَا تَشۡعُرُونَ (55) أَن تَقُولَ نَفۡسٞ يَٰحَسۡرَتَىٰ عَلَىٰ مَا فَرَّطتُ فِي جَنۢبِ ٱللَّهِ وَإِن كُنتُ لَمِنَ ٱلسَّٰخِرِينَ [(56)... في تلك اللحظة استعذت بالله من الشيطان الرجيم، ورجعت بموجة غضبي واستيائي لمكتبي مش عارفة أركز في حاجة سوى إيجاد مهدئ ينقذني من نفسي غير الانتحار.

***

 زمان شفت فيلم (Me Before You) شفته في السنة اللي كانت علامة فارقة في حياتي -في 2016- في هذا العام إيماني بالحب ذهب مع الريح، أغلب علاقاتي تصدعت وظهرت الوجوه على حقيقتها، حياتي المهنية دمرتها بيدي، وبدأت أعيش مرحلة من أزهى عصور الاضمحلال على الصعيد النفسي، المادي، العاطفي... الخ.

ولكن وبالرغم من كل ما سبق حينما رأيت الفيلم كنت معترضة جدًا على فكرة موت البطل، كيف يعطونه حقنة قاتلة ويدّعون أن تلك الطريقة ستُريحه من عذابه، كانت فكرة "القتل الرحيم" من وجهة نظري وقتها فكرة عبثية وخزعبلية جدًا... القتل هو القتل، والانتحار هو الانتحار مهما حاولنا تلطيف المصطلحات... وتساءلت بغضب: احنا بنهزر ولا بنستعبط احنا هنكون أحن على البشر من خالقهم؟؟؟ الغريبة أن الفيلم أخد جائزة بيبول تشويس لأفضل فيلم دراما... البشر كانت ولا تزال معتوهة يا عزيزي....

لكن قبل حديثي مع شيطاني قلت لنفسي: فعلًا الإنسان عدو ما يجهل... في 2016 أنا كنت مُشبعة بمشاعر الصبر والثبات الانفعالي والتفاؤل -رغم كل ما حدث- بس بعد مرور 10 سنوات اكتشفت إني مشحنتش بطاريتي أو يمكن لم أحظى بفرصة شحنها قط؛ فمنذ ذاك الحين لم تستطع الروح مجاراة الأحداث التي ذبحت كل خلايا الصبر عندي... المشكلة الحقيقية التي يجهلها الجميع هي إن الحل الوحيد لحالتي بيدي أنا، وإن أساليب العلاج النفسي التقليدية لا تصلح مع أمثالي؛ لأني ببساطة عارفة كل الألاعيب النفسية وكل طرق العلاج بس مش عايزة أتعالج دلوقتي عشان العلاج هيجبرني على النسيان، والغفران.... ولو نسيت وسامحت هيجي عليا يوم مش هتقبل فيه أيّ علاج من حد حتى من نفسي، وقتها الانتحار هيكون آخر همي عشان هيكون عندي أهداف تانية أعم وأشمل، وأكثر دموية.

الحل إيه بقى عشان أنا مش ناوية أخسر دنيتي وآخرتي عشان شوية حثالة؟؟

الحل بسيط جدًا: كل كائن مُتخيل نفسه مظلوم وهو في الحقيقة شيطان مُقنع هيسعدني تمامًا التعامل معاه لحد ما أعرفه على شيطانه... هو ده علاجي، إني أحل المشكلة من جذورها؛ لأني لمّا برجع بذاكرتي للزمن البائت بتعصب أوي من نفسي عشان صعب عليها تواجه أشخاص بأخطائها، كنت متخيلة أني بحميهم، مكنتش عايزاهم يعرفوا نفسهم على حقيقتها عشان ميكرهوش نفسهم ويقولوا: ياااه أنا إزاي كنت بالحقارة دي؟ وعشان خفت على مشاعر ناس لا تستحق الخوف من أجلها أنقلب السحر على الساحر وتخيلوا إن صمتي معناه إنهم صح وأنا اللي غلطت في حقهم.

نعود لموضوع الانتحار اللي كنت بفكر فيه بجدية إمبارح وكأنه موت رحيم في حين إن الرحمة الحقيقة هي الحياة... أنا لازم أحب حياتي عشان أنقذ كل الناس اللي شبهي (أو اللي شبهي من يوم ميلادي لحد يونيو 2026) وألحقهم قبل ما يدمروا نفسيتهم لإنقاذ نفسية الآخرين، خاصة بقى لو كان الآخرين دول ميستهلوش الإنقاذ أصلًا.

شكرًا لكل الناس اللي كلمتني إمبارح والنهارده على التليفون والواتساب والماسنجر، متقلقوش أنا بستخدم السكاكين مع الأكل بس والمقص مع الورق، ولو حبيت أنتحر هشوف طريقة شاعرية وهاخد بنصيحة زيزي وهشتري دواء صراصير؛ لكن حتى الآن أنا حابة الحياة ومؤمنة أن كل اللي مريت به هيساعدني في حلمي الحقيقي "بريد القراء/ بريد الجمعة" لأن مفيش إنسان هيقدر يساعد إنسان غيره إلا لو كان فعلًا حاسس بمشكلته.

شكرًا لمُنقذي: الرز بلبن.. أنا عرفت دلوقتي بس ليه أنا اخترتك بتأني.

اللهم إنا نعوذ بك من همزات الشياطين وأن يحضرون، ونعوذ بك من الحور بعد الكور...